«تۇركىستان قالاسىن تۇركى الەمىنىڭ مادەني-رۋحاني ورتالىعى رەتىندە دامىتۋ بويىنشا باس جوسپاردىڭ تۇجىرىمداماسىن ماقۇلداۋ تۋرالى» قازاقستان رەسپۋبليكاسى پرەزيدەنتىنىڭ جارلىعىنا
تۇسىنىكتەمە
مەملەكەت باسشىسىنىڭ 2018 جىلعى 19 ماۋسىمداعى №702 جارلىعىمەن تۇركىستان قالاسى تۇركىستان وبلىسىنىڭ اكىمشىلىك ورتالىعى بولىپ جاريالاندى, بۇل تۇركىستان قالاسىن تۇركى الەمىنىڭ مادەني-رۋحاني ورتالىعى رەتىندە دامىتۋ بويىنشا باس جوسپاردىڭ تۇجىرىمداماسىن (بۇدان ءارى – تۇجىرىمداما) ازىرلەۋگە نەگىز بولدى.
2000 جىلى يۋنەسكو شەشىمىمەن قالا ءوزىنىڭ 1500 جىلدىعىن اتاپ ءوتتى.
2017 جىلى حالىقارالىق تۇركى مادەنيەتى ۇيىمىنا (تۇركسوي) مۇشە ەلدەردىڭ مادەنيەت مينيسترلەرىنىڭ تۇراقتى كەڭەسىنىڭ 34-وتىرىسىندا تۇركىستان تۇركى الەمىنىڭ مادەني استاناسى بولىپ تانىلدى.
تۇجىرىمدامانىڭ باستى ماقساتى مادەني-تاريحي جانە رۋحاني مۇرانىڭ ساقتالۋىن قامتاماسىز ەتەتىن تۇركى الەمىنىڭ ورتالىعى رەتىندە قالانى ودان ءارى دامىتۋدىڭ نەگىزگى باعىتتارىن ايقىنداۋ, سونداي-اق تۇركىستاندى ماڭىزدى وڭىرلىك دامۋ ورتالىعى ەتىپ قالىپتاستىرۋ بولىپ تابىلادى.
تۇجىرىمدامادا تۇركىستان قالاسىنىڭ حالىقارالىق, تۋريستىك جانە وڭىرلىك تۇرعىدان پەرسپەكتيۆالارى ايقىندالدى, قالانىڭ الەۋمەتتىك-ەكونوميكالىق الەۋەتىن, ونىڭ اۋماعىنىڭ پەرسپەكتيۆادا جوسپارلى ۇيىمداستىرىلۋىن, قالا قۇرىلىسى ايماقتارىنا ءبولىنۋىن, اشىق قوعامدىق كەڭىستىكتەردىڭ, تاريحي-تاقىرىپتىق پاركتىڭ, ەكولوگيالىق ستاندارتتاردىڭ, تۇرعىن ءۇي-كوممۋنال-
دىق ينفراقۇرىلىمنىڭ جۇيەسىن قالىپتاستىرۋدى قامتيتىن, تۇرعىن حالىق سانىنىڭ ۇزاق مەرزىمدى كەزەڭگە بولجامدى ۇلعايۋىن ەسكەرە وتىرىپ كەشەندى دامىتۋ كوزدەلگەن.
بولاشاقتا تۇركىستان قالاسى الەمدىك دەڭگەيدەگى تۋريزم مەن زيارات ەتۋ ورتالىقتارى سياقتى اكىمشىلىك-ىسكەرلىك, رۋحاني, مادەني جانە تۋريستىك ورتالىق رەتىندە قالىپتاساتىن بولادى.
ورتالىق ازيانىڭ اۋماعىندا ۇلى جىبەك جولىنىڭ تۋريستىك مارشرۋتىن جاڭعىرتۋ ەكونوميكالىق دامۋعا سەرپىن بەرەدى.
تۇركىستاندا قالانىڭ ماگيسترالدارى ماڭىنداعى اۋدانداردا قوعامدىق ورتالىقتار قۇرۋ ارقىلى «پوليورتالىق» جۇيەسى قامتاماسىز ەتىلەدى. ءاربىر اۋداندا قولايلى تۇرعىن ءۇي جاعدايلارى جانە جۇمىس ىستەۋگە, ءبىلىم الۋعا, دەمالۋعا ءتيىستى مۇمكىندىكتەر جاسالادى.
قالانىڭ ورنىقتى ەكونوميكالىق دامۋىنا جاڭا باعىتتاردى ەنگىزۋ جاڭا كاسىپورىندار مەن وتكىزۋ نارىقتارىن كەڭەيتۋگە جانە قۇرۋعا, حالىقتىڭ ءال-اۋقاتى مەن تابىسىن ارتتىرۋعا سەپتىگىن تيگىزەدى.
تۇجىرىمدامادا قالانىڭ كولىك-ترانزيتتىك الەۋەتىن ۇلعايتۋ جانە ورنىقتى دامۋىن قامتاماسىز ەتۋ ماقساتىندا ينفراقۇرىلىمىن نىعايتۋ جوسپارلانعان.
پرەزيدەنت اكىمشىلىگىنىڭ مەملەكەتتىك باقىلاۋ جانە اۋماقتىق-ۇيىمداستىرۋ جۇمىسى ءبولىمى